Betutteling (column Frouk Alice Weijs)

In de serie columns ‘Zeg et ies’ schotelt de redactie maandelijks een vraag voor aan Frouk Alice Weijs uit Sint Jansklooster. Vandaag deelt ze haar mening en ervaringen naar aanleiding van de volgende vraag: ‘De bestuurders van hogerhand zien het niet zitten dat wij massaal het ijs op gaan, mocht het flink gaan vriezen. Hoe kijk je aan tegen dat soort waarschuwingen? ‘

Ik kan mi’j niet meer an de indruk onttrekkn dat wi’j mit zien alln in een ni’je fase terechte koomn bin. Een fase die volgt op et virus dat et hele land al zolange in gijzeling hölt. Een fase die ik niet anders kan umskrievn as betutteling.

Zo heurde ik demissionair premier Rutte zeng, al of niet humoristisch bedoelt: ‘Met het oog op de komende winterdagen en het bijbehorende schaatsen: val niet, want ziekenhuizen zitten niet te wachten op botbreuken.’

Mit andere woordn, aa-j toch moedwillig gien rekeningn willn holln mit et virus en toch goan schaatsn, kiek dan heel goed uut, heur. Want veur da-j et weetn val ie en mu-j in et argste geval nur et zieknhuus. Maar ok aa-j mit de fiets of auto argens nur toe goan, kiek dan ok heel goed uut, heur! Want veur da-j et weetn glier ie weg en mu-j in et argste geval ok weer nur et zieknhuus.

En dat mut niet want et zörgpersoneel ef et al te drok. Eigenlijk is et et beste um in oen huus te blievn, niet de weg op te goan, niet te genietn van een mooi stukkien schaatsn. En stel aa-j toch zo onverantwoord willn weezn, fiets en schaats dan wel op anderhalve meter ofstand van mekare. Want stel oe veur da-j mekare in die vrieskolde besmettn.

Ok et koek- en sopie gebeurn op de iesbane is an betuttelende bandn e-legd: niet in dat gezellige en warme hokkien mit zien alln, nee, buutn blievn stoan, et doar bestelln en nuttigen. Mit anderhalve meter uut mekare. Ok et rondtien skaatsn, doe dat in oen ientien en mit ofstand van die andere eenzame skaatser. Ongeleuvelijk, wat een betutteling. Et mankeert er nog maar an of de minister gef et advies in hoeveule minuutn wi’j de warme sukelamelk of koffie op muttn drinkn.

Ok Staatsbosbeheer dut een betuttelend duitien in et zakkien. Stel da-j goan skaatsn tussn de rietkraggn, zoas hier in Sint Jansklooster, woag et dan niet um te lange op iene plekke te blievn hangn. Dat verstoort de natuur… Ik weet niet of ze et in de gaatn em, maar skaatsers bin over et algemeen gien hangjongeren/olderen. Die skaatsn van a nur b.

De veiligheidsregio’s vroang skaatsers um weg te goan as et te drok is op de iesbane. Maar wat is drok? Wie bepaalt dat? Kump er een intekenlieste? Maang alleen leedn skaatsn? Um meugelijke uutwassn te veurkoomn adviseern ze doarumme de iesclubs um een ‘coronacoördinator’ an te wiezn. Die kan dan de bane dichte gooin as er te veule volk is.

Dan vroag ik mi’j of: wie zol der zo gek willn weezn? Want wie mag hi’j of zi’j dan wegstuurn? Iemand die hi’j/zi’j niet mag? Of een akkefietien mee ef? Of iemand die te langzaam skaatst? Of te snel? Of er al een ure is? Of een ure en vief minuutn?

Zelfs onze Stienwiekerlandse burgemeester Bats mag ingriepn as wi’j ons as schaatsers niet an de regels holln. ‘Burgemeester, hier sprek de coronacoördinator van IJsclub Ons Genoegen te Sint Jansklooster. Der skaatsn hier veul te veule meinsn en ze willn niet weggoan as ik ze dat vroage! Ik redde et niet um de örde te holln! Ze bin zo dwars as ik weet niet wat! Ku-j disse kante eem opkoomn? Neem ok vustig wat politie mee, ik vule dat er een rel an zit te koomn!’

Et echte dieptepunt van betutteling las ik vanmörn: bi’j een bulte sni’jval wördt deur de Rijksoverheid of e-roadn um een sni’jballngevecht mit meinsn van een ander huusholdn te holln. Mocht ie toch de drang niet kunn onderdrukkn dan mag dat, mits (aa-j goed kunn richtn binn anderhalve meter) et op ien persoon van dat andere huusholdn is…

Echt, et is dat ik een rieme um de broek ebbe, anders luup ik now in de blote bienn.

Disse ongeleufelijke betutteling veur een paar daang skaats- en sni’jplezier, et knaagt mien hele zenuwstelsel nur de knoppn.

Ik bepale zelf wel woar ik goa loopn, fietsn of skaatsn tiedns de koomnde (hopelijk) sni’j- en vriesdaang. As dit zo deurgoat start ik persoonlijk een éénmans-rel. Bekeur mi’j dan maar, pak mi’j maar op, zet mi’j in et gevang.

Wat betreft mien ofzakkende broek is er toch ien betuttelend advies dat ik wel kan waardeern en woar ik netuurlijk zelf nooit an e-dacht zol em: Weerplaza adviseert iederiene die der op uut goat um zich warm an te kleedn. Want et wördt kold…

Frouk Alice Weijs