Coronapaspoort (column Frouk Alice Weijs)

In de serie columns ‘Zeg et ies’ schotelt de redactie maandelijks een vraag voor aan Frouk Alice Weijs uit Sint Jansklooster. Vandaag deelt ze haar mening en ervaringen naar aanleiding van de volgende vraag: “Als het aan veel fracties in de Tweede Kamer ligt, is het coronapaspoort een goed idee. Met een app kun je bijvoorbeeld aantonen dat je het virus niet onder de leden hebt. Is dit volgens jou een goede manier om het virus onder de duim te krijgen?”

En ja heur, wat deur de regering tiedn terugge al in de wiek is e-zet wördt weer um e-zet tot een definitief besluut.  Ja, ik zegge ‘weer’. Want hoeveule van zukke belonnegies ef Rutte al op e-loatn tiedns de coronacrisis? En hoeveule balonnegies bin doarnoa, mit et neudige kneedwark van Rutte en Hugo, mit een noodgang uut e-gruuid tot luchtballonn die zien negatieve weerga op de saamnleving niet kent?

Woar eerst nog e-zegt wörde dat de mondkappies zo snel meugelijk weer of e-schaft zolln wörn, muttn wi’j ze now vollop draang. Verplicht. Woar eerst e-zegt wörde dat een oamdklokke as leste moatregel in e-voerd zol wörn, is ie inmiddels in e-voerd. Verplicht en mit een meugelijke bekeuring bi’j overtreding. Woar eerst e-zegd wörde dat de oamdklokke as eerste moatregel weer of e-schaft zol wörn, is ie now zelfs verlengd.

Woar eerst e-zegd wörde dat een vaccinatiepaspoort echt et leste zol weezn, wördt ie now onder et mom van: doe et veur oen noaste, een verplichting veur een bezuuk an een festival of (grote) bi’jienkomst. En woar eerst e-zegd wörde da-j bi’j gien klachtn niet hoevn te testn, adviseert Hugo now in iens um dat wèl te goan doen. Dat alles is in mien oong niks minder as een indirecte vaccinatieplicht.

En ik bin doar um twi’j redenen faliekant op teeng. Ten eerste mag de demissionaire regering bi’j de grondwet mi’j niet verplichtn um een vaccinatie te neemn. Ik neme die dan ok niet. En loat niemand mi’j betichtn dat ik egoistisch bin, dat ik niks veur mien zwakkere oldere over ebbe. Dat eb ik wel, maar mit mondkappien, handwassn en ofstand holln. Al is ’t mit grote weerzin.

Ten twi’jde mag de demissionaire regering bi’j de grondwet mi’j niet verbiedn um argens nur toe te goan as ik gien bewies (middels een sneltest) kan loatn zien dat ik op dat moment gezond bin. Dat is een ingriepende inparking van mien vri’jheid. En dat mag niet. En ik eise mien grondrechtelijke vri’jheid gewoon keihard op deur niet te vaccineern, niet te sneltestn en dus ok gien vaccinatiepaspoort bi’j mi’j te draang. Ik mag dat nog steeds zelf bepaaln.

Ik trekke dit hele verhaal eem deur nur bijveurbeeld et Kloosterse bloemencorso. Mag ik ongevaccineerd en zonder bewies van gezondheid eigenlijk wel an de weg stoan? Mag ik as ongevaccineerde figurant en zonder bewies van gezondheid wel op een corsowaang stoan?

Mag ik as ongevaccineerde muzikant en zonder bewies van gezondheid wel mit de fanfare meeloopn tiedns et corso? Mag ik ongevaccineerd en zonder bewies van gezondheid wel nur de priesuutreiking in de feesttente?

Mien burgerrecht wördt op disse maniere op een schokkende wieze an de kante e-scheuvn. Ik mag pas weer deelneemn an de saamnleving noa een vaccinatie en een bewies van gezondheid. Dit valt onder de noemer: medische apartheid.

Hugo de Jonge twitterde zelfs dat de eerste sneltestn as proef al gangs bin op een skoele: eerst testn veurda-j nur skoele goan. Goat dat goed dan ku-j binn ofzienbare tied die testn zelf anschaffn, hopelijk bi’j de drogist of supermarkt. Joepie!

Eem serieus: maang onze (klein)kienders in de toekomst dan alleen nog maar middels een corona-negatieve sneltest nur skoele? En mut dat um de drie daang? Of weke? En stel now dat ze een exaamn em? Of een kienderfeessien? Of een skoelereissie? En net op die dag wördt et arme kiend deur die thuussneltest positief bevunn op corona? Goat dan alles over?

En wat ef een paspoort in de lieve vrede veur zin as een gevaccineerde nog steeds corona kan krieng (zij het mild) en et deur kan geevn an een ander? De niet-gevaccineerde is dan toch een eem grote, bangmakende medemeins as de gevaccineerde? Hand wassn, mondkappien en ofstand holln blef ok veur de gevaccineerde groep toch de dagelijkse leefregel?

Denk ok veural effn noa over et volgnde: as iederiene op de dezelfde meniere gek wördt, dan wörn de meinsn die normaal e-bleevn bin as gek an e-zien.

Ie maang mi’j dus mit alle plezier ‘gek’ nuumn…

Frouk Alice Weijs