Op de Kloosterse bieb-barricades! (column Frouk Alice Weijs)

In de serie columns ‘Zeg et ies’ schotelt de redactie maandelijks een vraag voor aan Frouk Alice Weijs uit Sint Jansklooster. Vandaag deelt ze haar mening en ervaringen naar aanleiding van de volgende vraag: “Men wil de bieb in Sint Jansklooster sluiten. Kun je dat begrijpen?”

Eerlijk, ik wus niet was ik las. Et bloed steeg mi’j nur et heufd, mien arte maakte overuurn en mien inwendige meinse stond in de brand.

Ik las et nog ies over en kwam tot de conclusie dat ik et goed e-leezn adde. NIET TE GELEUVN, ZE FLIKKN ET WEER! Opni’j is de biebelotheek in Klooster, (noast die van Gietern en Stienwiekerwold) hoogstwaarschijnlijk de klos. Et bestuur van de Biebelotheek Stienwiekerland, Stappest en Zwartewaterland ef namelijk (onder anvoering van directeur Hans Hilbers) in heur wiesheid besleutn dat genuumde biebs weer op de nominatie stoan um te goan sluutn.

Joaren geleedn, toen ik nog in et bestuur van Plaatselijk Belang Sint Jansklooster/Heetveld zat, em wi’j mit etzelfde bieltien muttn hakkn. Ok toen vond et bestuur et beter um de bieb te sluutn. Mit man en macht em wi’j ons, saamn mit de vri’jwilligers van de bieb, verzet teeng dit dramatisch domme besluut. Een bieb weghaaln in kleine kernen, terwijl der zo ontzettend veule gebruuk van e-maakt wördt, hoe krieng ze et in de harsens! Em ze dan van de veurige keer niks e-leerd?

Wat bin er toen veule bewiezn an e-draang um et belang van onze bieb an te toonn: veule bezuukende olderen, complete skoeleklassn die bijna wekelijks onder leiding van hun juf of meester boekn uut koomn zuukn, moeders mit kienders die vrachtn boekn meeneemn en hun kienders eem lekker loatn rondneuzn tussn de boekn. (Ik weet woar ik over proate, ik eb een poosien vri’jwilliger e-west) Wat was et genietn um dat kleine spul in de boekies te zien trekkn. En netuurlijk, as er weer zo’n explosie e-west was van een löslopende skoeleklasse, mos er weer et ien en ander recht e-zet en op e-ruumd wörn. Leezn is leevmtig, ok et zuukn nur leuke boekn is leevmtig.

Meinsn ontmoetn mekare in de bieb, gesprekkn wörn er op gedempte toon e-voerd, ervaringn van boekn wörn uut e-wisseld, een grappien, een grollegien, nuum maar op.

En now meent et bestuur dat et beter is um de bieb te sluutn en et vri’jgekoomn geld te inversteern in de bieb in Stienwiek! Doar zakt mi’j echt de broek van of. Hoe kan et bestoan dat zo’n zieke gedachte opkump! As bestuur zet ie oezelf dan totaal te kakkn. Ik neme toch an dat een bestuur van bibliotheekn juust leezn wil stimuleern? Doarveur zittn ze toch in zo’n bestuur? Of eb ik et mis? Bin ze ontdoan van ienig empatisch vermoogn veur hun lezende publiek? Zittn ze doar enkel en alleen om de financiële stroomn goed te loatn verloopn? En dan ok nog, as dennenoalde op de brandneteltaarte, de reedn angeevn dat et mut um in een andere stad een bieb te kunn bekostign!

Bin der dan in de lieve vrede gien andere maniern te bedenkn um an geld te koomn? De vrijwilligers van onze Kloosterse bieb warkn zich een slag in de rondte (en mit veule liefde!) um onze bieb in et leevn te holln. Ad dat bestuur maar een fractie van die instelling, dan zol et veurtbestoan van de bieb niet elke keer in et gedrang koomn. En netuurlijk wördt ons dan weer, net as de veurige keer, zo’n wörst veur hölln wörn dat er wekelijk een bibliotheekbus langes kump (as die nog bestoan)! Of dat wi’j wel nur de Venose bieb kunn. Ammenooitniet!

Ik hope dat onze gemeenteroad, noa een goed gesprek mit direkteur Hans Hilbers, een maniere wet te vienn um onze biebelotheek oopn te kunn holln. Van mien part schakeln ze RTL nieuws in!

Want leezn mut binn handbereik blievn.

Wi’j leezn umdat wi’j niet alles zelf kunn bedenkn.

Hoe meer wi’j leezn, hoe slimmer wi’j wörn.

Wi’j leezn um soms op andere gedachtn te koomn.

Wi’j leezn um eem te kunn ontsnappn van de dagelijkse sleur.

Wi’j leezn um ons, al is et maar een pagina lang, te verplaatsn in een andere wereld.

Elke kleine kern ef recht op een fysieke bibliotheek. Dat mag nooit op offert wörn veur financieel gewin van een andere bieb. Ik zegge: op de Kloosterse bieb-barricades!

Frouk Alice Weijs